நினைத்துப்பார்க்கிறேன்
என் பள்ளி நாட்களை
நெகிழ்ந்து போகிறேன்
நெஞ்சம் கனத்துப்போகிறேன்
பட்டாம் பூச்சியாய் பறந்த
பாலர் வகுப்பு பருவம் - அதில்
குறும்புத்தனம் புரிந்து - தினம்
குதூகலிக்கும் பல தருணம்
கற்பனையில் கதைகள் சொல்லி
களிப்புக்கொண்ட பருவம் - அதில்
கவனமுடன் படிப்பதிலும்
இருந்தது என் கவனம்
செல்லச்சண்டை பிடித்துக்கொள்ளும்
நண்பிகளின் கூட்டம் - பின்பு
அடுத்த நொடியில் இணைந்துகொண்டு
நடத்திடுவோம் ஆர்ப்பாட்டம்
இடைநிலை பிரிவை - நான்
அடைகின்ற தருணம்
இடையிடையே போர் அனர்த்தங்களும்
அரங்கேறும் தினமும்
படிப்படியாய் அப் போர்
மூண்டெழுந்திடவே - அதில்
மாண்டழிந்தது - என்
பட்டப்படிப்பு கனவே
விடை தெரியா வினாவாக
இருந்த எதிர்காலம்
விடை தேடி வந்தடைந்தது
அந்நிய தேசம்
எதிர்கொண்ட சவால்களோ
எண்ணற்றவை - ஆயினும்
என் அன்னையின் அரவணைப்பின் முன்
அவை சொற்பமானவை
கருகிய செடி
மீண்டும் துளிர்த்தது போலவே - என்
கல்வியும் துளிர்விட்டு
தழைத்தது மீண்டுமே
கண்களில் நீருடன் இரைமீட்கிறேன்
கனவாய் தோன்றும் என் பள்ளி நாட்களை
இருப்பினும் இன்னும் நான் பயணிக்கிறேன்
என் எதிர்கால இலட்சியம் தனை நோக்கியே.
நீலா.
No comments:
Post a Comment